Gal 1 | GAW | STEP | Da Paulus, da am Jesusnu totol danab. Da am danab dilag totol iiṯa. Laa ele amu danab laa nug da Jesusnu totol uḏat heḵulnu ii meiḏom. Iiṯa. Jesus Kristus amu ig Mamenig Kayak, Nug Kristus moḏp̱anu bau maḏ eṯom ele amu, Nug ele, a aaḵuib da meiḏpiḏ.

Galatians 1

NAI ENA AMU LAIP̱U DAAṮE

1 Da Paulus, da am Jesusnu totol danab. Da am danab dilag totol iiṯa. Laa ele amu danab laa nug da Jesusnu totol uḏat heḵulnu ii meiḏom. Iiṯa. Jesus Kristus amu ig Mamenig Kayak, Nug Kristus moḏp̱anu bau maḏ eṯom ele amu, Nug ele, a aaḵuib da meiḏpiḏ. 2 Da lailad oh, da ele daaṯem ele, ig uḏug imu ag kristen tamaniak Galata ap̱a daaṯeb, ahilagnu yaaṯem. 3 Kayak, ig Mamenig, amu Naḏi Jesus Kristus ele, ahilah ehaniṯak oḵai hamu megṯep amu ahilah maḏoḏ ele ahilagp̱a daaglahnu oonig daaṯe. 4 Kristus Nug Kayak, ig Mamenig, Nug oo dayom amu dim lamiṯa, Nug ihinig hip̱unin uhuqa megaḵunu, Nug nuḵa bau dayak nuhig uua, ad emaitakp̱a mauhom. Nug anam heumnu diig am, Nug ig kobol nau, gemu wanp̱a daaṯe, amu waap̱a ii daamtanu heum. 5 Amunu ig hanhan Kayak onig humagnig. Genab.

6 Ag Galata ag kobol heṯebnu amu da oolp̱a eheḏ dooṯem. Kayak Nug ag Kristusnu ehaniṯak oḵai hamu maṯom, uḏat naḏi amup̱a ag onilagp̱a eum amu ag pahanab Nug uuna, ag Jesusnu Nai Ena di meṯan, ag nai laa, danab laala ag gona mehuqeg doona, ag nai laa amunu ag, “Nai ena,” aon aṯeb ele amu, ag nai amu dim lamidṯeb. 7 Amge Nai Ena laa ii daaṯe. Iiṯa. Amge danab laala ag heeg, ahilag dab mak kabolie, danab amu ag Kristusnu Nai Ena amu eḏuegeg, ib laap̱a goḵunu heṯeb. 8 Amge ig, ig Nai Ena anuḵa ag amelagp̱a mehuqmut, ig nai amubia iiṯa mehuqḵunig dayeb, o iiṯa hab aṯannu engel laa nug Nai Ena anuḵa ig ag amelagp̱a mehuqmut amubia iiṯa mehuqḵu dayeb amu, aria danab amunu amu, Kayak Nug nuhigp̱a eheḏ haḏ! 9 Da ag amelagp̱a ami, amubia da aaḵu baula aṯem. Am danab laa nug nai laa, Nai Ena anuḵa ig ag amelagp̱a mehuqut aop̱ig amubia iiṯa amu, nug ag amelagp̱a nai laa amu mehuqeb, aria Kayak Nug danab amu eheḏ haḏ! 10 Nai da gemu aṯem imu amu danab ag dahilnu oolagp̱a ena dooglagnute aṯem? Iiṯa! Da Kayak Nug dahilnu oo ena dooḵunu heṯem. Da am danab ag oolag iṯag qeḵunuib heṯemte? Am da danab iṯag qeḵunu heṯem dayeblob amu aria da Kristusnu uḏat nid iiṯa daalom.

PAULUS NUG TOTOL DANAB BEUMNU NAI

11 O lailad, da tutuḵu ag amelagp̱a iiḵu aṯem. Nai Ena anuḵa da ag amelagp̱a mehuqmi amu danab laa he ii beum. 12 Da amu danab laa nuhigp̱anu ii aomi. Laa ele amu danab laa nug da amu ii ip̱uniḏom. Iiṯa. Jesus Kristus Nug nuḵa da ip̱uniḏom.

13 Am da kobol anuḵa, haen da Juda dilag kobol amu dim lamiṯe, kobol hemi amu ag amu dooṯeb. Kayaknu kristen tamaniak aqak danab am da iiḵu, ag iiṯa meḵulagnu da wagai mein, huana hemi. 14 Da lailad oolagp̱a, danab bau kuḏum da ele huu laip̱u amu da ag eḏaṯe, da Juda dilag kobolnab dim lamidmi. Da alalad aḏi dilag kobol amu, da amu oh g̱agaṯagnab dim lamidḵulnu hemi. 15 Amge Kayak, Nug anai da ii menuiḏom haenp̱a, Kayak Nug da tituaniḏa, nuhig ehaniṯak oḵai hamu megṯe, amup̱a Nug da onilp̱a eum ele amu, Nug nuḵa dahilnu dab ma, 16 Nug da Nug Beḵanu Nai Ena amu iiṯa aḏi amelagp̱a mehuqḵulnu da ip̱uniḏom amge da haen amup̱a aḏi nai mehuqḵulnu danab laala ele nai ii maṯimut. 17 Amu danab tatam ag Jesusnu totol danab daap̱ig amu da ag gumaṯe Jerusalem ii gomi. Iiṯa. Da Arabia wanp̱a gomi. Uḵoya dimp̱a am da eḏue Damaskus gomi.

18 Aria dimp̱a maḏ ewam uḵe amu da Petrus ele nai maṯignihnu Jerusalem gomi. Am da Petrus ele deḏ 15 anam daamuḏ 19 amge da Jesusnu totol danab laa ag ii anadmi. Da Jakobus, Naḏi amag, nugib da anidmi. 20 Nai imu gemu da ahilagnu yaaṯem amu da Kayak noobp̱a nai genab aṯem, da ag ii bup̱ualadṯem. 21 Amu dimp̱a amu da laih Siria am Silisia dilagp̱a gomi. 22 Amge Juda kristen tamaniak, ag Kristus ele tamanip̱ig amu, ag da iḏul anidna ii doop̱ig. 23 Ag nai inam aaḵuib maṯieg doop̱ig. “Anuḵa danab nug ig iqom, nug aun aḏi ag oop̱a genab doyak ele, ahilagnu eheḏ heum amu, gemu nug Nai Ena amu mehuqṯe,” anam ap̱ig. 24 Kayak Nug dahilp̱a anam he, ag nai doonna amu ag Nug onig humap̱ig.